Ռուսաստանյան խաղաղապահ զորախմբի հրամանատար, գեներալ-մայոր Անդրեյ Վոլկովի հրավերով ԴԻԱԼՈԳ կազմակերպության նախագահ Յուրի Նավոյանը նոյեմբերի 10-ին Ստեփանակերտում մասնակցել է Ռուսաստանյան խաղաղապահ զորախմբի ներկայության երկրորդ ամյակին նվիրված միջոցառումներին:
Արդեն երկու տարի է, որ Ռուսաստանյան խաղաղապահ զորախումբը, որը տեղակայվել է 2020 թ. նոյեմբերի 10-ին Ռուսաստանի և Ադրբեջանի նախագահների և Հայաստանի վարչապետի ստորագրած եռակողմ հայտարարության հիման վրա, իրականացնում է Լեռնային Ղարաբաղում խաղաղության պահպանման գործունեություն:
Հակամարտության գոտում ռուսաստանյան խաղաղապահների ներկայությունը ապահովել է իրավիճակի կայունություն և կրակի դադարեցման ռեժիմի պահպանություն, ինչպես նաև պայմաններ է ստեղծել տարածաշրջանում խաղաղ կյանքի վերականգնման համար:
ԴԻԱԼՈԳ կազմակերպությունը աջակցություն է ցուցաբերում Լեռնային Ղարաբաղում խաղաղության և կայունության ապահովմանը, ինչպես նաև Ռուսաստանյան խաղաղապահ զորախմբի հետ միասին իրականացնում է համատեղ հումանիտար ծրագրեր:
2021 թ. դեկտեմբերին Ռուսաստանի Դաշնության Պաշտպանության նախարարության հետ համագործակցաբար ԴԻԱԼՈԳ կազմակերպությունը իրականացրել է «Շնորհակալություն խողաղապահներին և Հայրենիքի պաշտպաններին» սոցիալ-մշակութային ծրագիրը:
Հասարակական լայն արձագանքի է արժանացել 2022 թ. օգոստոսին խաղաղապահների հետ համատեղ Մոսկվայից Ստեփանակերտ ծանրակշիռ քանակությամբ ուսումնական և գեղարվեստական գրականության տեղափոխումը և Լեռնային Ղարաբաղի կրթական համակարգին հանձնումը:
Այդ ժամանակ Ստեփանակերտի Գրիբոյեդովի անվան թիվ 3 դպրոցը ստացել է դասագրքերի ամբողջական փաթեթ` շուրջ 17 հազար օրինակ, իսկ Լեռնային Ղարաբաղի 108 միջնակարգ դպրոցները` ռուսական գեղարվեստական գրականություն` մոտ 7 հազար օրինակ:
Ավելացնենք, որ նոյեմբերի 9-11-ը Ստեփանակերտում գտնվելու ընթացքում ԴԻԱԼՈԳԻ նախագահ Յուրի Նավոյանը նաև մի շարք հանդիպումներ է ունեցել տեղի պաշտոնական դեմքերի, քաղաքական շրջանակների և ռուսական համայնքի հետ, որոնց ընթացքում քննարկվել են համագործակցության հետագա ծրագրերը: