«Ճանապարհային դեպարտամենտ» հիմնադրամը Եվրոպական ներդրումային բանկի տրամադրած դրամաշնորհային միջոցներով 2023 թվականին կշարունակի Հայաստանի ճանապարհային անվտանգության բարելավման ծրագիրը, որի շրջանակներում կիրականացվեն 20 վթարավտանգ կետերի բարելավման աշխատանքներ։
Մ-4, Մ-6, Մ-14 և Մ-16 ավտոճանապարհների վրա երթևեկության անվտանգության ապահովման միջոցառումներ կարվեն 4 վթարավտանգ կետերում։ Շինաշխատանքների իրականացման համար հայտարարված մրցույթի արդյունքներն ամփոփվել են։ Կապալառու կազմակերպության հետ պայմանագիր կկնքվի 2023թ. փետրվարին, որից հետո կմեկնարկեն շինարարական աշխատանքները։
Հիմնադրամից նաև հայտնում են, որ Մ-3, Մ-9 և Մ-12 միջպետական ճանապարհների վրա ևս 16 վտանգավոր կետերի շինարարական աշխատանքների իրականացման նախագծման գործընթացներն ավարտվել են։ Հաշվի առնելով ընտրված ճանապարհների վթարավտանգ տեղամասերի առանձնահատկությունները և բնութագրերը՝ նախագծերով նախատեսված են հետիոտնային մայթերի, անցումների և արհեստական անհարթությունների կառուցման, արգելափակոցների տեղադրման, նշագծման, ճանապարհային նշանների տեղադրման, ջրահեռացման համակարգի բարելավման և այլ աշխատանքներ։
Նախագծերը հաստատվել են ՆԳՆ կողմից և ներկայացվել են տեխնիկական փորձաքննության։ Այս պահին մշակվում են նաև մրցութային փաստաթղթերը։
