Թուրքիան չի բացառում մոտ ապագայում Սիրիայի հետ հարաբերությունների կարգավորումը։ «Ռիա Նովոստի» գործակալության փոխանցմամբ, այս մասին ասել է նախագահ Ռեջեփ Թայիփ Էրդողանը։
«Մոտ ապագայում, ինչպես սկսվեց Եգիպտոսի հետ կապված գործընթացը, նույն կերպ կարող է սկսվել նաև Սիրիայի հետ։ Քաղաքականության մեջ դժգոհություններ չեն լինում»,- ասել է պետության ղեկավարը։
Միաժամանակ, Թուրքիայի ղեկավարը նշել է, որ ոչ ոք չի կարող խանգարել Անկարային՝ ապահովելու իր սահմանների անվտանգությունը։
Անցած շաբաթվա վերջին թուրքական բանակը Սիրիայի հյուսիսում և Իրաքում օդային գործողություն է իրականացրել երկրում արգելված Քրդստանի աշխատավորական կուսակցության սիրիական թևի դեմ։ Էրդողանն այն հաջող է անվանել և չի բացառել, որ դրան կհաջորդի նաև ցամաքային գործողությունը։ Ռուսաստանի ԱԳՆ-ում նախազգուշացրել են, որ դա կարող է մեծացնել լարվածությունը տարածաշրջանում և հանգեցնել ահաբեկչական ակտիվության աճի:
